En sabeda ai 13 de jugn la Musega Auta Fascia à sonà sunsom al Sas Pordoi. N conzert endrezà con la voa de pontèr via endodanef
N conzert dassen fora de anter chel portà dant da la Musega Auta Fascia sun un di spic più maraveousc de nosc raion, i 2.950 metres de Sas Pordoi. Tras melodìes armoniouses e delicates, l grop l’à volù dandaldut recordèr la vitimes che à fat l Covid-19 te Fascia e foradecà. L conzert, con inom »Fiores che renasc«, l’é stat pissà belapontin per dèr n segn de fiduzia e de speranza dò i burc momenc passé per via de la epidemìa ma ence per ge sporjer n fort develpai a dotores, infermieres e assistenc sanitères che se à dat jù zenza fin te chesta situazion senestra. L conzert é stat portà dant en ocajion de l’orida di prumes impianc portamont anter chisc ence la forenadoa de nonzech de Pordoi.
La Musega
à portà dant desvalives toc che é stac touc sù e mané fora en direta streaming su la piata Facebook de la sociazion e coscita la jent à podù scutèr sù endodanef la sonèdes de la Banda. Anter chestes »Ich hatte eine Kameraden«, »Dem Land Tirol die Treue«, »Wir Musikanten« e »Mein Heimatland«. N moment dassen da emozion l’é stat canche la Musega à sonà l’In Ladin e l’Ave Maria col solit maester Roberto Silvagni. L conseier provinzial ladin Luca Guglielmi l’à volù pojèr n maz de fiores jai piesc de la crousc de Sas Pordoi e l’à uzà fora l develpai a la Musega per aer endrezà chest conzert. Paroles de aprijiament e de voa de repartenza é states palesèdes ence dal conseier de Comun Marco Dellantonio, dal vize president de la SITC Daniele Dezulian e da la responsabola de l’ofize stampa de l’Apt Elisa Salvi. Duc chenc à sotlineà l’emportanza de chest conzert per ge sporjer l develpai ai operatores sanitères, recordèr la vitimes del Covid e soraldut per pontèr via endodanef co la musega che porta coraje e legreza per l scomenz de la neva sajon da istà.
Apede a chest l’é l valor emportant che à volù uzèr fora la Musega Auta Fascia, chel de la comunanza che se la vel pontèr via endodanef la cogn stèr ensema, descheche l’à fat ti momenc senestres, per renascer desche i prumes fiores che ciuta sù te l’ultima neif de l’invern. Chela neif che i museganc à amò troà sunsom Sas Pordoi, neif che deslebia coi prumes raes ciauc del soreie e renasc a neva vita.
De più su la Usc nr 24 stampèda ai 19 de jugn (MCI)
