La Usc di Ladins

»Se jai egn i me aessa dit che assane fat n Conzert d’Aisciuda en streaming, me aesse pissà che i é mac!« Coscita à dit l president Mathias Pezzei Pencio tel verjer l Conzert de la Musega de Poza en sabeda sera, se sà ben da soa stua, desche perauter la prejentadora Alessandra Catellani, manco agitada sun paladina de n tendon strapien che sun cariega te majon, e desche l maester Giancarlo Dorich Cavei. 

No podea menciar valch parola, dedant ai zirca 150 coleé en direta (ma per ogne contat l’era familie entrìe a vardar e scutar), per rengraziar chi che deida, a partir dal Comun de Sèn Jan, l Consorzie Eletrich de Poza e l Comun General de Fascia, ma ence duta la jent che ge stasc apede a la Musega e amò de più chi che sona, prejentan l nef ruà Daniele Dorich e con n batiman spezial a chi che à arjont n bel travert te la banda: Vanessa Tomasi (10 egn), Marianne Deluca (15), Mathias Pezzei e Mirco Lorenz (25), Giuliana Brunel (30), Lucia Dellagiacoma (35), Stefano Cigolla (40) e Barbara Croce con ben 45 egn de »onorà servije«.

Per i sonadores de Poza l nef scomenz é tacà te Val de Sèn Nicolò, olache l post per star a distanza no l mencia. »Desche chisc albres, de gra a nosce reisc ben leé a noscia tera, podon se trar envers l ciel, pean via da chel che siane bogn de far miec e da nesc recorc più bie« à dit l Maester Cavei. E anter i recorc più bie l’é apontin l conzert di Sons de la Dolomites sun Vael del 2018, con Paolo Fresu. L’é stat na gran fortuna, per la Musega de Poza, poder sonar con chel che l’é fosc l musizist jazz talian più cognosciù a livel internazional e ence chest’outa Fresu à tout sù l’envit di sonadores ladins e l se à metù a la leta debant per valorisar con sia tromba divina la beliscima ciantia sarda »No potho reposare«, scrita da Giuseppe Rachel sul test de la poejìa »A Diosa« de Salvatore Nisi e rangiada dal maester da Roveredo Marco Somadossi.


De più su la Usc nr 24 stampèda ai 19 de jugn


 (Lucia Gross)