La Usc di Ladins

Jà te la setemènes passèdes aon rejonà di problemes de la sociazions che laora coi bec sporjan atività via per l'istà. Aon domanà fora la situazion de Istà Algegra e chesta setemèna enveze seron l cerchie coi responsaboi de Inout, Marijene e Istà per bec de la Val de Sora.

Inout se enjigna a tor ite 191 bec e joegn: »Dut chel che vegnarà tout sù servirà per poder ge sporjer ai bec valch de più che le classiche atività zenza cost, per ge dar valch oportunità fora de anter ai bec«, chesta la rejon che à spent Inout a domanèr l didament economich de la comunanza te l'an del Covid che à metù en jeneie n muion de sociazions che se empegna tel setor de l'animazion. Cosć smaoré te l'endrez de la ativitèdes e te l'assunzion de personal per ge stèr dò a duta la normatives contra l virus, jà senestres da respetèr con duc i limic che les se tol dò.

Istà per bec, manco partezipanc?: »L'on cognù fèr mèl bolintiera, jà coscita cognon esser 13 maestres e, se assane tout sù duc i 118 bec, assane cognù ruèr a 16«. Istà per bec à donca cernù per endèna de no azetèr la domanes ruèdes tardives e cheles di bec fora provinzia, apede a vèlch domana che é stata touta de retorn da la families dò aer vedù la linies vida. La speranza del grop resta aboncont chela de n cambiament di protocoi tel raport bec-animatores o del didament de autres 3 animatores, per poder smaorèr l numer di enscinué e tor ite duc, n mudament che jà te chisc dis podessa ruèr: apontin canche nosc sfoi jia en stampa (mercol ai 17), aon sapù che podessa esser la possibilità de jontèr i 3 animatores nezessères per lurèr con duc i bec.

Marijene, spartijon di gropes e enscinuazions dantfora: dò i cruzies l'é ruà zacan la linies vida e coscita ence Marijene à podù se endrezèr, con gran lurier dessema ai Comitac. »No podaron tor ite più che 12 bec per atività, ajache sion doi animatores per paìsc e i bec i cognarà se enscinuar la sera inant. Se dapodò no vegnarà arjont l numer mascim de bec con le iscrizion, i podarà se jontar ite ence l dì do. Sarà fat doi gropes, con un animator e 6 bec, che no i podarà per nesciuna rajon se mescedar«.


Articol entriech su la Usc nr 24 stampèda ai 19 de jugn  (Daniele Verra)