La pandemìa no à ferà l gust de fèr teater, per chest uton l’é stat endrezà ence na comedia
Trenta egn de storia, de aventures, de comedies, de grignèdes de voa de fèr, de sentimenc da spartir con duc chi che à semper engaissà e aprijià i atores che te trenta egn à fat pèrt de n grop feruscol, ma con gran gust de ge donèr a sie publich momenc de spas e de legreza.
Per chest an l’era jà dut béleche endrezà ma a cajon de na pandemìa ria e pericolousa dut se à fermà e sessaben ence i festejamenc per chest gran travert de la Mizacoles. Ma l’é stat demò n moment de paussa ajache se per chest uton la situazion miorarà, la Mizacoles endrezerà sia festa a chela che duc é enviè a tor pèrt.
L’é stat enjignà n curt filmat che se podarà jir a se veder su YouTube tras n QR Code, olache vegn portà
dant la storia en curt del teater a Ciampedel contèda da atores de enlouta, amò apede vegnarà moscià situazions endèna la proes per endrezèr n spetacol e vèlch picol toch de comedia, dut chest per tor ite e spartir con duc l’emozion de fèr teater. Ma chest no l’é dut, l’é stat pissà a n codejel olache sarà ite i retrac di atores che à spilenà endèna la comedies che l’é stat portà sun paladina te duc chisc trenta egn e, per ge dir n gran develpai a duc, vegnarà spilenà na comedia... l doer ma soraldut l gust de ogne grop de teater. Per aer endrezà i festejamenc de chest bel travert ge die n bel develpai al president Gerardo Rasom, l vize president Egidio Lazzer, l responsabol de la comunicazion e di social Andrea Detomas, l petenador Cornelio Lazzer, la chitenadora Andrea Caola e duc i atores: Christian Favè, Domenico Bravi, Federica Davarda, Filippo Favè, Gaia Caola, Germana Riz, Manuela Spinel, Marion Boso, Maurizio Valentini, Ottavio Davarda, Paolo Mazzel, Pietro Riz, Roberto Paolinetti, Sabrina Riz, Samuel Lazzer, Sara Merighi.
Se vedon chest uton!
(Loretta Florian)
