La Usc di Ladins

I lurieres che à enteressà l pont sun ruf de Vael i à metù man via per l'uton passà e l'invern ma chesta aisciuda i é stac entardivé da l'emergenza per l coronavirus. Da pece setemane la firma Mirco Zenetin da Segonzan per cont del Servije Strade de la provinzia de Trent à strutà sù l'intervent che à domanà na speisa de 126 mile euro.

Chel del ruf de Vael l'é un di tenc ponc de la Gran Strada de la Dolomites, averta sul scomenz del 1900, che coleaa Busan con Cortina. Anchecondì chest stradon à na gran emportanza economica per la jent de Fascia e ence da autres raions. Da l'autostrada del Prener rua la gran part di ghesć da desvalives paijes de duta Europa e no demò.

Nosc conseier Bepe Detomas te n sie mandat à abù n gran da far percheche l Servije provinzial de le Strade l finanzie e l ge mete man a la streca Vich – Mont de Ciareja, termen col Sudtirol, percheche la provinzia de Trent no vedea nesciun enteress sun sie miorament, ajache sie obietif l'é che duta Fascia aessa da jir demò a Trent.

Ence l trasport publich, aldò de mie pensier, l'aessa da esser calificà, l'é stat miorà chisc ultimes egn coi coleamenc de la Sad anter Busan e Fascia, ma chest servije l rua entant enscin a Pera canche fossa de besegn che l tole ite duta la val enscin a Penìa.

En ultima, no fossa besegn de miorar demò l stradon de la Mont de Vich - Jouf de Ciareja ma ence i coleamenc e le strade envers i jouves dolomitans, su l'ejempie de chel che fasc la provinzia de Busan envers l Jouf de Sela.


Articol entriech su la Usc nr  24 stampèda ai 19 de jugn  (Franco Ghetta de la Filo)