La Usc di Ladins

Chisc meisc de emergenza sanitèra nazionèla l’é stat per valgugn moments dalbon senestres, soraldut per chela families che les à padì da la malatìa o per cheles che les à perdù, ence piutost coran e fora de n bel nia, sia jent. Ta Cianacei se à levà na gran manconia te duta la popolazion per Lorenzo »Renzo« Dantone del Pich e Massimo »Max« Pezzin, doi pères de familia e ence atives volontadives te sia comunanza. Più avisa a i recordèr l’é l Club Pietrone de Cianacei vidà da Monica Zanett de Cont. A inom di components del grop, tras La Usc, l Club vel ge uzèr fora la valuta de chisc doi amisc e l vel ence desmostrèr sia vejinanza a la families de Renzo e Max.

Renzo del Pich l’era »chel del formai« per l Club, percheche dalbon ogne outa che l’era da fèr chest mestier, l’era el che se cruzièa con chela che l portèa inant e endò materièl utol per l’endrez de la festes. Finamai a Portofino chest uton l’aea troà n meso valif da poder vidèr.

Max l’era ence n pilèster del Club da n muion de egn, l’era semper a la leta desche chelner e barist profescionist. »Se aon godù e se aon grignà teis ensema a ic, tel moment del lurier i à semper fat dut con serietà e responsabilità. I restarà te nesc cheres e te nesc recorc per semper. I ne menciarà. Nos del Club Pietrone – à dit Monica - volassane endrezèr n moment te gejia per ic, ma ajache indèna l’é dut amò massa en risech, speton che se podesse fèr delvers. Ge tegnissane ence a jir inant per l’endrez de la festes de la familia e de la jent de età, ma indèna se sà che no podon fèr trop. Sion pa semper positives e fin a l’ultim ge proaron e no se sà mai che per d’uton zeche se podesse fèr«.  (Club Pietrone)