La scolines adum chier n desch de confront

Data

11 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ge vel fèr n ragionament sun con endrezèr la didatica. Per tor ite duc i bec de la trei scolines provinzièles l’é de besegn de autra 6 maestres, la Scola Ladina fèsc dut l possibol
Les se à metù dutes ensema la scolines de Fascia, tant cheles provinzièles (Soraga, Pera e Cianacei) che cheles equiparèdes (Moena, Sèn Jan e Ciampedel) e les ge à scrit ai raprejentanc de la Provinzia de Trent, de la Federazion, al president Maurizio Fugatti, a l’assessor a l’istruzion e cultura Mirko Bisesti, al conseier ladin Luca Guglielmi, a la Sorastanta de la Scola de Fascia Mirella Florian, a la procuradora e senatora Elena Testor e a duc i ombolc e assessores a l’istruzion di Comuns de Fascia.
Con na letra di 4 de messèl les domana che vegne metù sù n desch de confront per ge permeter a duc i bec de poder jir a la scolina. »Desche responsaboi de la neva generazions a duc i livìe cherdon che sie doverous ge desmostrèr a duc i bec, che à padì meisc de poures, malsegurezes e privazion, che i sforc che i à fat fin ades ge consent ence a ic na repartenza – scrif i genitores referenc de la scolines de Fascia. Pisson che sie fondamentèl che ence nesc bec posse endò tachèr ite sia routine e no i reste mèl tel veder che la emprometudes che ge é states fates da genitores, ensegnanc e politics no vegne mantegnudes, cheles emprometudes che prest i aessa endò podù jièr duc ensema, ciantèr e balèr. No se pel no conscridrèr i efec colaterai ti bec pìcoi del lockdown: apede a la mencianza didatica se veit ence manifestazions de dejède psicologich e de sanità.
Sion dalbon n muie cruzié ence per la situazion de noscia val – scrif amò i referenc - olache la clasc mesèna de la sozietà doventa semper più pureta e la situazion economica malsegura crea dejejès e desferenzes che podessa portèr a conflic te la families.
La scolina no cogn vegnir veduda demò desche n post olache i ge vèrda dò ai bec ma l’é n muie de più, l’é n lech de protezion sozièla, de promozion de la sanità e de suport emotif. Cherdon che l mudament portà dal Covid cogne esser l pont de partenza per fèr n ragionament sun co endrezèr la didatica a na vida miora e no esclusiva. Ge dèr la possibilità a duc i bec de jir a scola l’é n obligh sozièl e la cura di bec no l’é zeche de privat, ma l’é n ben comun.«
I genitores con chesta letra domana che duc se mete a la leta per meter sù n desch de lurier per envièr via n confront, per tor dant criteries e linies vida e fèr nascer endodanef la scola, soraldut en previjion de chest uton.

De più su La Usc 27 di 10 de messèl  (Monica Cigolla)