La Usc di Ladins

Canche na persona se mèla, la stenta fisicamenter o col cef e no la pel più per sé, l’à de besegn che valgugn che la deide fora te si enteresc. Per chest l’é stat pissà a meter sù na fegura de protezion giuridica, perveduda dal codesc zivil, che posse esser de didament per n trat de temp o ence a dò a dò. Se trata de l’Aministrador de Sostegn (A.d.S.) che l’é chela persona che gestesc l cont de banca e duc i adempimenc de carater burocratich-aministratif te l’enteress de la persona che no pel per sé, la pel tor dezijions de natura personèla, sanitèra e assistenzièla per l benesser de la persona. L’Aministrador de Sostegn l’é donca chela fegura che la colabora con la rei de servijes che à en cèria la persona, la la met semper al zenter de ogne cernia e la la compagna te sie percors de vita col ge dèr coscita maor serenità travers sia prejenza e sie didament. Te la maor pèrt di caji chesta encèria vegn touta sù da un de cèsa ma canche chest no l’é possibol vegn cernù n volontadif.
La Sociazion Comitat per l’Aministrador de Sostegn tel Trentin se dèsc jù da oramai più che 10 egn per dèr fora informazions e didament ai sentadins che se troa a cogner fèr afidament a n Aministrador de Sostegn e a chesta persones a les didèr fora te sia encèria. L servije vegn fat travers portìe de informazions sul teritorie ma ti egn l’é vegnù fora ence l besegn de chesta fegures de aer n spazie de confront con autra persones che fèsc l medemo mestier. Da chiò l’é nasciù la pruma sperimentazion del grop CONfrontTiAmoCI, na scomenzadiva che vel responer al besegn de n muie de Aministradores de momenc de baratament e de confront, te n ambient segur e de benstèr.

Duc i apuntamenc su La Usc 40 di 09 de otober