Se cognarà spetèr che da man di Comuns de Fascia rue ite la nomines di raprejentanc de vigni aministrazion per l Comun General de Fascia, inant de poder chiamèr ite l nef Consei General.
Endèna aboncont l nef procurador Giuseppe Detomas à metù ensema sia squadra de goern per poder scomenzèr a lurèr: la pruma scontrèda é perveduda ti prumes dis de la setemèna che vegn.
L nef Consei de Procura tol ite 6 componenc e de chisc doi l’é femenes. La più litèda, Mirella Florian, se cruziarà del setor sozièl, de la politiches per arsegurèr l derit al studie, de coordenament e sostegn a la ativitèdes de volontariat e de edilizia abitativa.
Martina Pederiva à tout sù la competenzes su ambient, ecosostegnibilità, rei de la resserves e gestion e desgorta del refudam. A Riccardo Donei ge é stat dat la deleghes sul bilanz, l turism, la gestions sozièdes e l coordenament de la politiches di comuns en materia de comerz e artejanat, enveze Giorgio Dorich se cruziarà de la costions che revèrda l sport, i trasporc, i troes da mont. La pianificazion urbanistica, i zentres storics, i lurieres publics, l patrimonie imobiliar e la viabilità sarà competenzes te man de Carlo Ganz, endèna che Amedeo Valentini se cruziarà de inovazion, cultura, politiches linguistiches e politiches per i joegn.
L Procurador tol sù en pruma persona la competenzes che revèrda l personal, la relazions istituzionèles, i raporc con la Scola ladina, la presidenza de la Comiscion per la pianificazion teritorièla e l paesaje e ogne autra competenza no data sù.
De più su la jontes de Ciampedel e Mazin su La Usc 40 di 09 de otober
