La Usc di Ladins

Chest an 2020 jìa fora l Consei de l’Union di Ladins che l’à regnèda trei egn e dachelanvìa la Festa del Rengraziament l’é stat ence l’ocajion per fèr la litazions per sie renovament. I sozi à podù litèr no demò via per l domesdì de la domenia te chino de Cianacei ma ence dut l dì l lunesc ai 12 de otober te senta de l’Union a Sèn Jan.
L Consei tol ite 21 persones, aldò del Statut de la sociazion va ite de derit l candidat più lità de ogne paìsc e dapò chi che ciapa più stimes, chest per arsegurèr na giusta raprejentanza a duta la val. De derit fèsc pèrt ence l president onorarie Antone Polam e la presidenta del Grop ladin da Moena.
Chest’outa l’é stat n bel moviment per la litazions, con passa 70 sozi che à dat jù sia stimes. Con gran piajer se à vedù gran gaissa te n bel grop de joegn, da duta la val, che se à arvejinà a la sociazion, se à fat l tesserament e à volù se meter a la leta. I à volù adertura se prejentèr sun paladina del chino Marmolèda per se fèr cognoscer da la jent e per portèr dant la rejons de sia candidatura: Nicoletta Riz e Alice Deflorian da Cianacei, Elisa Calligari e Melissa Locatin da Poza e Christopher Bernard da Ciampedel. »Sion chiò anché percheche dajon valor a l’esser ladins – i à dit per ousc de Alice Deflorian. Pisson che sie na gran fortuna aer rità n scì prezious patrimonie culturèl, sozièl e linguistich e pisson che sie nosc doer l stravardèr. Vedon l’Union di Ladins e sia esperienza desche n strument per stèr vejin a la comunanza, a la sociazions de val, ai gropes di joegn e a chi sportives coscì da entener coluns che l’é i problemes de noscia val e troèr ensema soluzions e neva proponetes per rencurèr noscia jent e nosc patrimonie. Se meton adum tant per stravardèr che per valorisèr nosc lengaz e nosc folclor ladin. Per crescer pisson sie de basa lurèr ensema, mescedan i pensieres de chi che à più esperienza con la idees de la neva generazions per portèr dant projec ùtoi e inovatives.«
Apede a ic se à metù a la leta ence n auter joen, Damiano Bernard da Pera e i neves candidac Nives Iori, Annelise Vian, Agatha Brunel, Andrea Zanoner e Manuela Spinel, che i farà pèrt per la pruma outa del Consei.
Apede a chisc neves candidac l’é ruà ite ence Fernando Brunel, Stefano Weiss, Lucia Gross, Michele Decrestina, Fabio Chiocchetti, Riccardo Zanoner, Andy Rossi, Barbara Bonu, Franco Ghetta e Celso Rizzi, che à fat pèrt del Consei ti egn passé e che se à metù dant ence chest’outa per portèr sie contribut a la sociazion. L prum Consei vegn chiamà ite en lunesc ai 19 de otober. Chiò vegnarà ratificà la litazion, nominà l president e dat sù l’autra encèries.
L’Union di Ladins à jà palesà la speranza che chi che se aea metù a la leta ma no é stac lité i reste dut un apede a la sociazion per la didèr te sia desvaliva scomenzadives.  (Monica Cigolla)