N codejel rich de recorc preziousc

Data

15 de otober 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’Union di Ladins de Fascia à dat fora n nef liber de Fernando Brunel: »Mie istà sun Tamion«
N’é passà de aga ju per nesc ruves da chel’aisciuda del 1961, canche Luigioto Brunel da la Riza da Soraga se à cordà con Luijio del Paula per ge manar sù so fi a far l paster »a la foresta« sun Tamion.
Fernando enlouta l’aea demò 13 egn, ma l’esperienza de chel istà te chela picola vila de Vich la é restada fona te sie ciaf e te sie cher.
L temp é passà e endana si dis de vacanza a Creta Fernando l’à scomenzà a meter jù si recorc, scric sessaben a man, sun de gregn codejìe brugn, enterzan sia pascion per le parole a chela per i colores, vide desferente per fermar sun n papier o su na teila momenc uniches, acioche i no vae perdui.
Te l’aisciuda del 2020, i meisc de carantena à reportà più vive tel ciaf de Fernando le parole, i colores, ence i musc e le ousc, ma soraldut la sensazion de pasc de chel istà acà beleche 60 egn. E l’à tacà a scriver...
»... sentà jù sun Col di Cé enlongia chel veie larsc... me varde la val, i crepes, i paìjes de Fascia... L’é n parfum de net, de aria bona e fresćia… l’é temp de Corona… speron en ben. Me vegn tel ciaf canche ere bez, chi momenc a remonar sun chi pré de Parlaut. Enlouta l’era chel chiet, a part valch forest via per l’istà… ei, somea dalbon chi tempes, chi recorc che i dajea vigni moment curiosità, valch da nef...«
Coscita i recorc tegnui sù da Fernando Brunel te chi codejìe brugn i à podù doventèr n bel liber, n scrin prezious de la picola storia de noscia comunanza, dac fora da l’Union di Ladins de Fascia tel liber »Mie istà sun Tamion«.

De più su La Usc 41 di 16 de otober  (Lucia Gross)