L 2020 l’é stat n an critich per l’istituzion culturèla de Fascia, con contrasć e gregn mudamenc, ampò rich de atività e fruc
L’an 2020 te l’Istitut Cultural Ladin se à avert con na costion che à soscedà discuscions e che dapò l’à creà contrasć e spartijons. A ge dèr fech al stopin l’era stat, amò de november del 2019, la dezijion palesèda dal Conseier ladin e secretèr politich de la Sociazion Fassa Luca Guglielmi de fèr n dessegn de lege amò de jené per passèr l’Istitut Cultural Ladin sot la gestion aministrativa del Comun general de Fascia. Na proponeta critichèda, prum de dut percheche no l’era stat sun chest nesciun confront ne col teritorie ne con l medemo Istitut, ma ence tel merit ajache per cont de l’Union di Ladins, de la Comiscion culturèla e del diretor de l’ICL chest passaje aessa podù complichèr la robes enveze che les
miorèr. La Comiscion culturèla, vidèda da la professora Ulrike Kindl aea domanà sobito de n rejonèr con l Consei de Aministrazion (lità del 2019 con a cef la presidenta Lara Battisti) e col conseier Guglielmi e canche ai 20 de firé i doi organismes de l’Istitut à podù se binèr (zenza la presidenta che chel dì la era a Roma al convegn su la mendranzes) l’é vegnù fora n biteboi che à avert na crepa anter Comiscion culturèla e Consei de Aministrazion de l’ICL e doi componenc del Consei, l raprejentant de la mendranza del Comun General Andrea Rizzi e la raprejentanta de la Comiscion culturèla tel CdA Lodovica Dioli à dat sia demiscions. Ai 23 de jugn l Consei general à aproà la nomina de Matteo Ploner de Consei al post de Rizzi e tel CdA per la Comiscion culturèla à tout pèrt la presidenta Kindl. Ampò la crepa anter i organismes de l’ICL é restèda, tel moment delicat del mudament del diretor.
De più sul mudament del diretor e su la ativitèdes de l'Istitut Cultural Ladin te l'an 2020 é da poder lejer su La Usc de vender ai 8 de jené.
