Neveres e levines sun Marmolèda

Data

15 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
De dezember del 2020 da la pèrt nord del giacé se à destacà na gran levina che à sepolì l refuge Pian di Fiacons e la stazion de l’impiant. Ma, ti egn passé, n’é vegnù jù n muie de autres
L meis de dezember del 2020 se à avert con na nevera da record soraldut te chisc ultimes egn de ciarestìa. Tel cef de la jent l’é più i recorc de invergn con pecia neif che chi per ejempie del 2013/14 o 2008/09 con crevaies de neif. Chest percheche sion leé a na economìa, chela da d’invern, leèda al sport del schi, ai impianc portamont e portoes, zenza la neif sbarèda dai canons no se fossa jic dalonc; l’é tel cef che zenza i canons no se pel più stèr ma besegna ence l freit aldò.
Purampò ence acà n pec de egn n’é vegnù n maraut, bèsta se recordèr l’invern del 1986, n crevaie de neif à enteressà dut l raion dolomitich crean na zopa de dejèjes per la jent, l trafich serà e zenza strom per 4 o 5 dis alalongia.
Amò etres invergn de gran neveres à enteressà duta la Èlpes. I più de età i se recorda chel del 1951/52 da november a d’aisciuda, con gregn problemes de magnadiva, i scrignes di pomes de tera e de farina beleche vec e l besegn de trèr jù la neif dai cuerc de la majons dant che zede dut dal gran peis de la neif. E co la gran neveres ence l pericol de la levines.
E apontin co la nevera di prumes dis de dezember passà na gran levina à enteressà dut l parei nord de Ponta Rocia, da Sas Bianch al parei de Rocia, levina che jun Pian di Fiacons à desfat la stazion a mont de la »gondoles« de l’impiant da Fedaa su e ló enlongia l Refuge Pian di Fiacons.
Chela de dezember 2020 passà l’é una de la tantes levines che à enteressà duta la pèrt nord de la Marmolèda, a memoria de om e documentèdes l’é cheles del 1946 e del 1958 che les à portà demez l veie refuge e che se à salvà per miracol l patron e i sie de cèsa.
Ma n muie de autres ti egn ’70 les é passèdes a dreta o a cencia de la utia e de l’impiant portamont.

De più su La Usc 02 di 15 de jené  (Fernando Brunel de la Riza)