La Usc di Ladins

Col nef an 2021 Alessandro Pellegrin da Soraga l’é ofizialmenter l nef Ispetor di Studafech del Distret de Fascia. L tol l post de Giancarlo Pederiva da Poza che l corìa chesta encèria dal 2013 e che ai 30 de otober del 2020 l’é stat lità president de la Federazion di Studafech del Trentin.

La nomina de l’assemblea del Distret de Fascia é jà stata ai 5 de dezember ma dapò ge à volù spetèr la delibera de la Jonta provinzièla per la conferma ofizièla.

Alessandro Pellegrin l’é del 1970, l fèsc pèrt di Studafech de Soraga da 30 egn, tel passà l’é stat ence caposquadra e per 10 egn l’é stat comandant del grop de sie paìsc.

»Canche me é stat proponet de tor sù l’enciaria - à dit Alessandro Pellegrin - no ere mia proprio tant segur, ge é pissà sora delvers, dant de dir de scì é volù scontrar duc i comandanc, ge é dit che me piajessa che sie la colaborazion de duc, che sie n dar e n aer, percheche un da soul sunsom no fasc nia. Duc à dat sia desponibilità e coscita é azetà. Sion ponté via con n bon endrez da man de duc. L’é ence da dir che podon aer chiò te val l president de la Federazion Giancarlo Pederiva che ne stasc apede e ne deida. Gio no voi rebaltar sù chel che l’é stat fat ti egn passé, l’é stat lurà ben te duc i ciampes e proprio chest me à dat la spenta a dar mia desponibilità. Gio faré mingol da pont anter la Federazion e l Distret de Fascia con i desvalives responsaboi di setores, sion dalonc da Trent e per chest cognon vardar de aer n bon endrez.«

De più su La Usc stampèda de en vender ai 22 de jené del 2021  (Monica Cigolla)