Te la seconda puntata de en vender ai 22 de jené se podarà veder i paesajes de noscia val e sentir la testimonianzes de Filippo Riz, don Mario Bravin e Maria Bosin
La jent e i paesajes de Fascia e Fiem sarà i protagonisć de la seconda puntata de »Vulnerabili, atti di speranza nella pandemia«, la trasmiscion diozesana che vegn manà fora en vender ai 22 de jené da les 20.30 su Telepace Trento e en streaming sul canal YouTube de la Diozesa. Chesta trasmiscion se met dant de lejer i desvalives aspec de l’emergenza travers l test de la Bibia, la paroles del Piscop de Trent don Lauro Tisi e la testimonianzes regoetes sul teritorie. L test di Ac di Apostoi che aur la puntata l’é chel olache se conta de la varijon del storpie su l’usc »bel« del Tempie da man de Piere e Jan (Ac 3, 1-10). Te chesta puntata, rencurèda dal Servije Comunicazions de la Diozesa de Trent e Telepace, se se domanarà soraldut
coluna »lezion« che ne vegn da la pandemìa respet a la relazion anter nos e Die e a che vida, seré anter chest contest de padiment, la comunità religiousa pel se fèr portadora, desche i prumes apostoi, de la richeza de la persona de Gejù. Tel storpie, soraldut te chest moment de pandemìa, podon veder ogneun de nos, con nesc padimenc. E la Gejia, descheche à fat Piere e Jan, pel se meter a la leta per compagnèr la persones tocèdes da manconies, padimenc e dificoltèdes.
Te la trasmiscion vegnarà moscià imagines de doi valèdes che à n straordenarie patrimonie natural che ades é »congelà« da l’emergenza sanitèra, teritories che te chest moment no pel se orir ai ghesć e donca a sia vocazion de acolienza turistica.
Apede a la paroles de Monsegnor Lauro se podarà scutèr la reflescions del cognosciù fisich Roberto Battiston e la oujes di protagonisć sul teritorie: Filippo Riz, patron del refuge Spiz Piaz te Gardecia, don Mario Bravin, preve de Cianacei e Ciampedel e Maria Bosin, ombolta de Pardac.
