La Usc di Ladins

»Al scomenz no eraane segures che la posse doventèr. Dapò aon tacà a sperèr, lurèr, se confrontèr, endrezèr. Da sobito l’é stat chièr che assane abù de besegn del didament de duc: colaboradores, staff, volontères, sostegnidores, autoritèdes, enc. L’é stat na Marcialonga desvaliva ma aede permetù che dovente possibol n pìcol gran miracol.« L’é l rengraziament uzà fora dal Comitat de endrez de la Marcialonga sun sia piata Facebook.

Chela che se à dejout en domenia ai 31 de jené l’é stat la 48^ edizion de la Marcialonga de Fascia e Fiem, na edizion desvaliva, per via de la restrizions per Covid, ma istesc vivuda de pien tant sportivamenter che personalmenter dai concorenc.

Per doer de cronaca dijon sobito che dò 10 egn, la Svezia l’é endò stat la venjidora e no demò con i omegn con Emil Persson (3 ores e 11 menuc) ma ence con la femenes con Lina Korsgren (3 ores e 27 menuc), i neves leader de Ski Classic.

Dut e duc ence chest’outa à didà a fèr garatèr na edizion per nia sorida da endrezèr ajache se à cognù respetèr n protocol anti Covid n muie rigorous. »Ben segur vèlch cruzie l’era – à dit l president Angelo Corradini a la fin de la garejèda – la net dant no é dormì nia a pissèr che sie dut a post e dapò l’é stat ence la neif che ne à fat desperèr, ma a la fin aon vedù che à paà la speisa, duc é stac contenc. Ere cruzià ence per vèlch scelta tecnica, per ejempie a Soraga l’era n toch de percors unich olache cognea passèr chi che jìa en su e chi che vegnìa en ju, per fortuna la é jita ben, nesciugn se à encrojà. Cogne rengrazièr duc i volontères e l Comitat de endrez che domesdì à fat partir i mesi per bater la scines soraldut per didèr dò i bisonc che senó i se aessa troà l percors n muie roinà.«

En dut i concorenc rué al travert a Ciavaleis é stac 1.071: 895 omegn e 176 femenes. L’ultima a serèr sù la garejèda l’é stat Nicoletta Mazzel col temp de 9 ores e 59 menuc.

L mior di taliegn l’é stat Mauro Brigadoi del Team Sottozero che se à vadagnà la 24^ posizion enveze de la eles l’é stat Ilenia Defrancesco da Masi che fèsc pèrt de l’Eserzit, ruèda 18^ e mìngol più endò, l’é Sara Pellegrini del Team Robinson Trentin ruèda 21^.

Anter i prumes concorenc fascegn uzon fora i resultac de Diego Deflorian (Ski Team Fascia) 131°, Flavio Pellegrin (Team Futura) 132°, Remigio Defrancesco (3Esse Soraga) 164°, Erwin Riz (Ski Team Fascia) 173°, Elio Decrestina (3Esse Soraga) 246°, Erwin Chiocchetti (Ski Team Fascia) 336°, Giancarlo Fontana (3Esse Soraga) 348°, Manuel Bernard (Bela Ladinia) 451°, Adriano Winterle (Ski Team Fascia) 458°, Damiano Lorenz (Marcialonga) 468°, Chiocchetti Lodovico (Monti Pallidi) 489°.

De la femenes enveze l’é Patrizia Lorenz (Marcialonga) 96^, Alessia Micheluzzi (Marcialonga) 118^, Michela Costa (Bela Ladinia) 126^, Ilaria Petrone (Marcialonga) 127^, Daniela Croce (Marcialonga) 128^, Anita Florian (Ski Team Fascia) 146^, Lara Battisti (Ski Team Fascia) 174^.

De più su La Usc stampèda de en vender ai 5 de firé del 2021.

 (Monica Cigolla)