La Usc di Ladins

L Comun general de Fascia à manà fora chisc dis n apel ai sentadins per i envièr a seghitèr a respetèr la normes e la regoles per l contegniment de la pandemìa.
»Per desfortuna chest temp senester che sion dò a viver somea che no l fosse amò fenì – se lec te l’envit manà fora. – Enceben che se veit n arbassament del numer di malé de Covid, che vegn ca dal respet de la indicazions che l’é stat dat jà dal scomenz de la pandemìa, desche durèr l couribocia, se lavèr bendeché la mans , stèr dalonc dai etres, schivèr festes, ence anter chi de cèsa, la situazion somea amò n muie critica.
I aministradores de l’Istituzion soracomunèla e di comuns de Fascia condèna vigni forma de trasgrescion e de dejobedienza de la regoles, n muie utoles per limitèr i dans a la sanità de la jent.
Per chest vegn sport, endodanef, n envit a duta la popolazion a n mior respet de la regoles per no se malèr de Covid a na vida da poder veder, ti dis che vegn, n auter smendrament di numeres di malé.
Se pel vegnir fora da chesta burta situazion demò de l’é la colaborazion de duc a l’osservanza de chel che perveit i protocoi sanitères, chest soraldut endèna che se speta che vegne metù a jir la vazinazions adatèdes per la età desvalives.«
L’envit fenesc fora con n rengraziament a duc chi che se comporta con responsabilità percheche i à a cher la sanità sia e de chi che ge stèsc vejin.