Angern, jebia ai 11 de firé, l Consorzie impianc portamont de Fascia e Ciareja à manà fora n comunicat con la ultima neves. Dò che l president de la Provinzia de Trent Fugatti à sotescrit l’ordenanza en mercol ai 10 de firé, i raions dai schi da la pèrt del Trentin del Comprenjorie Dolomites Superski se enjigna a orir. La machina de endrez de la sozietèdes de impianc à envià via la operazions per orir tel respet di protocoi de segureza per la perevenzion del contage da Covid 19.
En vender ai 19 de firé aur duc i impianc de Ciampedìe, 6 sun 6, e 10 impianc sun 16 sun Belvedere e Col Rodela.
L Consorzie domana che i schiadores sie responsaboi e che i respete la regoles e che no i vae coi schi se no i stèsc ben. I cogn se meter sù l couribocia chirurgich endèna che i é en couda, stèr a un metro l’un da l’auter e respetèr l numer de jent che pel montèr sù su la forenadoes e cabines (l 50%).
Sul sit dolomitisuperski.com l’é stat creà n nef shop online olache se pel se comprèr l skipass dantfora e esser segures de poder jir coi schi l dì cernù. I skipass se pel jir a i tor a la casses automatiches vejin ai impianc de Pera, Ciampedel e Cianacei opure ai pick up box de Dèlba, Poza, Vich e Ciareja.
Ence per saer cotant che l’é da spetèr a la casses o per jir sui impianc l’é stat creà n nef sistem informatif, a la leta con en vender ai 19, sui siti www.valdifassalift.it e www.fassa.com che vegn a dò a dò agiornà.
Chisc dis che vegn vegnarà fat a saer canche aur i etres impianc. (Monica Cigolla)
Te Fascia aur vèlch impiant
Se ponta via endodanef en vender ai 19 de firé.
Galaria retrac
View the embedded image gallery online at:
https://www.lausc.it/valedes-ladines/fascia/14818-te-fascia-aur-velch-impiant#sigProIdec32f46311
https://www.lausc.it/valedes-ladines/fascia/14818-te-fascia-aur-velch-impiant#sigProIdec32f46311