N an col 45 per cent de morc de più

Data

13 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
A la fin 2020 te val l’era 10.010 sentadins, 38 de manco che del 2019. L’é mort 109 persones e l’é nasciù 90 pìcioi
Se se spetèa n smendrament de sentadins via per l 2020 per via de l’epidemìa da Covid ma che la perzentuèla di morc rue adertura al 1% sul total de la jent che vel dir na persona ogne 100, e che la desferenza anter i morc del 2020 e chi del 2019 sie del 45% en più, no se se aessa segur pissà.
En dut i morc del 2020 é stac 109, 58 ic e 51 eles, del 2019 i era stac 75, 36 ic e 39 eles. Fossa stat enteressant saer cotenc che i é morc per Covid ma i ofizies anagrafiches di Comuns ne à fat a saer che ic no i é en possess de chisc dac.
I sentadins de Fascia a la fin del 2020 era en dut 10.010, 38 de manco che del 2019 canche i era 10.048. Resta positif, per grazia, l numer de nasciui, en dut 90, 20 de più che del 2019. Via per l 2020 l’é ruà adalèrch 48 pìcioi e 42 pìcioles. L scialdo natural, la desferenza anter nasciui e morc, é de -19 persones. L medemo numer l’é ence l scialdo anter i vegnui ite, en dut 253, e i jic fora, en dut 272. Del 2019 chesta desferenza era stata demò de -2 (306 vegnui ite e 308 jic fora) ma sun numeres n muie più auc.
Seghita a moscèr l segn negatif donca l numer de sentadins de Fascia. L’é da trei egn che l numer chèla: del 2018 -19 e del 2019 -7. Del 2015 Fascia aea arjont l numer più aut con 10.118, da enlouta anter smendramenc e demò pìcoi smaoramenc no se é più rué ai 10.100 sentadins.
Da dir che fazile en proiezion i egn che vegn l scialdo natural anter morc e nasciui sarà semper en negatif, la generazions di egn ’80 e ’90 à fat manco fies e donca sarà fisiologich n smendrament di sentadins.  

Podede lejer l'analisa entrìa sun l moviment demografich te Fascia sun La Usc 06 di 12 de firé  (Monica Cigolla)