La Usc di Ladins

L’é n bilanz positif chel de la Coprativa de Moena che se sera sù con n utol net de 350.530 euro. L faturat l’à passà via i sie milions de euro con n smaorament del 4,6% respet a l’an dant. I resultac positives di ultimes trei ejercizies à renforzà debel l patrimonie net de la sozietà che à passà via en valores assoluc i 2,2 milions de euro e la é ruèda al 48,3% del capital durà per investimenc. Amò apede l vadagn lordo l’é miorà respet a l’an dant del 1,6%. L’é i dac economics uzé fora tel cors de la radunanza de la Familia Coprativa de Moena che se à tegnù a ujes seré en vender ai 5 de firé per via de l’emergenza e l besegn de distanziament amò en cors per l Coronavirus. Via per l meis de jené i passa 1.000 sozi de la Coprativa à podù veder e dir la sia sul rendicont e sui etres ponc a l’orden del dì, travers l Raprejentant Designà. En dut 300 sozi à lità per l bilanz che chest’outa l’é segur da encornijèr.
»L’é stat dalbon aut l numer de sozi che à tout part a la radunanza, enceben te chesta forma anomala e freida« à dit l president Maurizio Deville palesan sodesfazion per la fiduzia desmostrèda e per la partezipazion a na radunanza che no aea a l’orden del dì nesciun renovament de la encèries sozièles. »I sozi à podù jir a se tor la soracuerta con int dute le informazion te una de la boteghe de la Coprativa e aboncont duc i documenc era a la leta ence te senta de la sozietà.«

De più sun La Usc 06 di 12 de firé