La Usc di Ladins

L dolor per la mort de Luca Attanasio, l’ambasciador talian te la Republica Democratica del Congo, copà ensema con l carabinier Vittorio Iacovacci e l sciofèr Mustapha Milambo, e la conferma del valor, del bon cher e de la capazità de chest joen talian, che te l’Africa no l’era demò n diplomatich che stajea tedò n pult, ma n om che chierìa de didèr la jent con gran spirit de solidarietà, vegn palesé ence te Fascia.

A i portèr dant l’é l Grop Miscionarie Freinademetz e Mato Grosso. La sociazion de solidarietà fascèna da passa 10 egn te la Republica Democratica la deida la Pediatria de Kimbondo, olache opera l miscionarie e dotor cilen P. Hugo Rios e olache l’era Betty Sommavilla da Ciampedel, che aló la é morta del 2010 ge metan te la mans e tel cher de Fascia i centenees de bec africhegn rencuré a Kimbondo.

L’é stat apontin Tullia Sommavilla – fèsc a saer Claudio Gabrielli, che tegn da semper la corespondenza coi miscionaries – a sentir al telefon P. Hugo dò aer sapù del fat teribol sozedù te la foresta de Virunga, tel stat african. L dotor miscionarie ge à palesà dut sie dolor e cruzie per la mort de chest joen ambasciador che el cognoscea personalmenter, ajache Luca Attanasio l’era stat a Kimbondo per veder la situazion e i besegnes de l’ospedèl e de l’orfanotrofie.

Sie didament, jonta ite Ivano Winterle, che l’é l referent de Kimbondo tel Grop miscionarie fascian, l’era stat più che n’outa prezious, per ejempie per consentir de fèr ruèr te la Tèlia bec che aea besegn de operazions delicates che tel Congo no fossa stat possibol fèr.

P. Hugo l’à dit che Attanasio l’é mort da martire, che l’é jà tel liber di sènc. L Grop Freinademetz se à binà virtualmenter insnet per preèr, per el e per sia familia, en particolèr per la vedova Zakia e la 3 picioles che per colpa de la violenza e de la gaitegaa di omegn les é restèdes zenza père.

 (Lucia Gross)