La Usc di Ladins

La Giornèda de la malatìes rères vegn recordèda ogne an a la fin de firé. Nasciuda del 2008, chest an 2021, dò 13 egn, la vegn zelebrèda en domenia ai 28 de firé.

La persones con na malatìa rèra, che per singola patologìes les é peces deldut, les é dutes ensema passa 300 milions te dut l mond. Aldò di Registres regionèi e l Raport MonitoRare 2020 te la Tèlia i malé de malatìes rères i é beleche 2 milions e de chisc 1 sun 5 l’é n bez. N muie de malatìes no à n inom e nience na cura ma per duc i malé l’é fondamentèl aer assistenza sozièla e sanitèra. Te chisc ultimes meisc ence chisc malé à padì de più, desche duc, per la situazion malsegura. L’é besegn donca de meter ensema la forzes percheche nesciugn reste endò.
L’Aministrazion de Comun de Cianacei, con sia assessora al sozièl Doris Fosco, à tout sù con enteress la proponeta de na tousa fascèna che à na malatìa rèra. »Tel mond l’é n muie de sorts de malatìes rères, n’é più che 6 mile e n muie de chestes no à nience n inom – l’à dit – la diagnosi la é longia e no semper sorida e te n muie de caji no l’é nience la cures. L’é n problem sconet che tocia n muie de families. Ma ensema se pel venjer, l’emportant l’é sensibilisèr la jent.«

Chesta tousa l’à enjignà ence na lingia de slide per fèr cognoscer l’argoment che vegnarà manèdes fora sul maxischerm de Cianacei ai 27 e 28 de firé. Dapò en domenia, dò les 17.00 via, vegnarà enlumenà la Cèsa de Comun con i colores de la malatìes rères.  (MCI)