La Usc di Ladins

L Consei de l’Union di Ladins de Fascia ence te chest meis de firé l’à portà dant desvaliva ativitèdes. L’é giusta stat manà en stampa l’Almanach 2020 e chisc dis vegnarà slarià fora sun la ones de Radio Studio Record ot programes radiofonics dediché a la giornèda de la femenes. Con l Comun de Cianacei va inant l percors de colaborazion per l’endrez de la tabeles con piroles de cultura e l’é peà via na colaborazion ence con l Comun de Ciampedel per meter sul maxischerm te piaz  aprofondimenc en cont di meisc te noscia comunanza, enjigné dal Consei de l’Union coi retrac de l’Istitut Cultural Ladin.

Fin ai 11 de mèrz vegn slarià fora sui canai social de l’Union di Ladins de Fascia e de TV Ladina la neva cater trasmiscions »A Spas per la Ladinia«, raides stroz per nosc raion per descorir più davejin l’ambient, noscia usanzes e tradizions che se pel ciapèr, ensema con la 8 raides fates ti egn passé, sun na chief USB che vegn data fora debant a chi che tol na publicazion de l’Union.  (NR)