Cena de benefizenza, ogneun a cèsa sia

Data

03 de merz 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La sociazion »La Voce delle Donne« endreza la consegna a cèsa en lunesc ai 8 de mèrz. Col vadagn la deida fora la femenes e la families en dificoltà de la doi valèdes.

Ence chest an la sociazion »La Voce delle Donne« no vel renunzièr a endrezèr l tradizional apuntament solidal per la festa de la femenes. De gra a la colaborazion con i cheghes de Fiem e la sociazion Il Germoglio vegn proponet la cena de benefizenza endrezèda oramai da 5 egn belapontin ai 8 de mèrz. Chest an purampò per via de la situazion pandemica no la pel vegnir fata en prejenza, per chest l’é stat dezidù de la fèr ogneun a cèsa sia, se strenjan virtualmenter ensema a duta la femenes, soraldut cheles che se troa te situazions de dificoltà o che padesc de maltratamenc o violenza e per poura no les vel denunzièr.

I cheghes de Fiem enjignarà la cena con: bruscheta de pan a la trota de Fiem en saor, capusc rosc en salmoa e sos a l’ef, porcel trentin en agrodouc e peverons, desche prum piat l’é lasagna de crepes con verses e formai e per douc la peta mimosa al limon.

Vegn durà dut prodoc biologics e del post a sostegn de la aziendes del teritorie. L priesc a persona l’é de 25 euro, per na familia de 2 gregn e 1 bez l priesc l’é de 60 euro e per na familia de cater con 2 bec l priesc l’é de 70 euro.

La consegna vegn fata dai volontadives te duta Fiem e Fascia, ge vel dèr jù la direzion prezisa e l numer de telefon, i passa en lunesc ai 8 de mèrz domesdì.

La prenotazions cogn vegnir fates fin en jebia ai 4 de mèrz (fin canche vegn arjont l numer mascim) ai numeres de telefon 0462 342085; 333 2682434; 338 2063667. L paament sul cont de la Cassa Rurala de Fiem. La sociazion »La Voce delle Donne« durarà l vadagn, tout via la speises, a sostegn de femenes e families en dificoltà te Fiem e Fascia.  

 (mci)