La Usc di Ladins

Seré su i apuntamenc con la Copa del Mond de schi de eles l’é stat giusta l moment de slizièr endodanef l portoi de La VolatA de Sèn Pelegrin che ai 2 e 3 de mèrz l’é stat da endrezèr doi garejèdes de SuperG de eles de Copa Europa. Presciapech n centené la atletes scrites ite en raprejentanza de 18 nazions. Sul portoi, desche diretor tecnich l’é restà Rainer Senoner, didà fora da Marco Costazza. Amò gran lurier de endrez del Ski Team Fascia che à moscià gran profescionalità te duc i apuntamenc.

Ence te chesta doi garejèdes de Copa Europa l’é stat endodanef la svizra la protagonista che se à confermà la squadra del moment.

En mèrtesc l prum sciaier del podie é stat vent da Jasmina Suter, seconda l’é ruà la russa Julia Pleshkova, a sie prum podie te Copa Europa e terza n’autra svizra Stephanie Jenal. La miora de la taliènes l’é stat la gherdenera Nadia Delago che é ruèda 8^ enceben che la sie pontèda demez col numer 41. Nadia Delago se à confermà amò n’outa una de la miores ajache l dì dò, en mercol ai 3, la é stata bona de se vadagnèr adertura la 4^ posizion con demò 48 centeisemes de destach dal podie.

Podie enveze per n’autra talièna, Karoline Pichler da Monte San Pietro de le Fiamme Oro, che la se à vadagnà la seconda posizion a demò 11 centeisemes da la venjidora russa Julia Pleshkova. Sul terzo sciaier enveze l’é ruà l’austriaca Sabrina Meier.

 (mci)