‘Bar Educante’: te pes dir la tia

Data

10 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L grop de partner teritorièi che met dant l projet, vel tor ite duta la comunanza per enjignèr n lech olà poder endò se troèr e stèr adum. 

L’à metù man la campagna per scutèr sù, outa soraldut a bezes e bec de noscia comunanza, per enjignèr n “Bar Educante”. N lech fisich olache se pel se troèr de persona, logà sul tegnir del Comun de Sèn Jan. N lech orì a duc e piajegol, olache la comunanza la posse troèr n’autra »majon«.

L ‘Bar Educante’ vel esser na oportunità de partezipazion e de inclujion per i joegn e la joenes de la comunanza: l vel i fèr sentir protagonisć e slarièr fora sia funzion de sentadins atives. Sarà n lech de beleza e de partegnuda, n lech olà fèr projec e aer ensomesc, n lech olà poder endò se troèr de persona, n lech per descorir, emparèr, stèr adum, fèr sport e troèr de neves peconc, per i joegn ma no demò.

Per tor ite te chest projet duta la comunanza l’é peà demez l percors per endrezèr ensema l ‘Bar Educante’ tras la partezipazion, per se pissèr e meter a jir, tant concretamenter che a livel culturèl, chest lech ret da na rei teritorièla metuda adum dal Comun General de Fascia, dal Comun de Sèn Jan, da la Coprativa sozièla Le Raìs, che la se cruziarà de la gestion del Bar e di percorsc per tor sù chi che laora laìte, da la Coprativa InOut, responsabola del zenter educatif inovatif, e da la Coprativa Oltre.

L prum vèrech l’é stat chel de meter jù dotrei domanes, outes soraldut ai joegn ma a cheles che pel responer ence duc i etres, per scutèr sù la jent: n moment de reflescion per entener coluns che l’é, per ogneun, i elemenc de maor emportanza de na ‘comunanza’ e da olache se cogn pontèr demez per jir envers l davegnir. Te n moment senester desche chel che sion dò a passèr l’é na reflescion amò più emportanta per meter dant de neva prospetives e de neva vijions per l doman che ne speta.

Per tor pèrt a chesta scomenzadiva se pel ge jir dò ai canai social del ‘Bar Educante’ – piates Facebook e Instagram – e responer a la domanes del chestionèr che podede troèr ence al link https://bit.ly/3f9YcTj

Pec menuc de temp per tor pèrt ativamenter a enjignèr n lech olà stèr adum e fèr adum.

 (mci)