La Usc di Ladins

La Cassa Rurala Dolomites à serà sù l bilanz 2020, n bilanz che conferma la bona situazion de l’istitut de credit enceben la pandemia. L’atività comerziala é semper en moviment con la regoetes e i empegnes (masses aministrèdes) de 1.643 milions de euro, n smaorament del 7%. La regoeta direta é cresciuda de 33 milions de euro (+5%) soraldut de gra ai deposic de families e firmes. La regoeta indireta, che revèrda l sparagn gestì e arseguratif, é smaorèda de 42 milions de euro (+16%). L’é cresciù de 36 milions de euro (+7%) ence i scioldi dac fora ai clienc che à podù se n emprevaler de la mesures de sostegn finanziarie del Goern jà da l’aisciuda passèda e del smaorament de la garanzìes publiches per ge jir encontra al besegn de la firmes. Via per l’an 2020 l’é stat contegnù la debites di clienc en dificoltà e smaorà l livel de mascima segureza. La debites di clienc raprejenta demò l 0,16% di credic. I resultac arjonc à didà ence a smaorèr l patrimonie de ‘Vigilanza’ che passa via i 84 milions de euro. L’utol de ejercizie l’é de 3,2 milions de euro.

Gran sodesfazion é stata palesèda dal president de la Cassa Rurala Carlo Vadagnini. »Del 2020 nosc istitut de credit à sostegnù desvalives projec emportanc, l’à dat fora passa 650.000 euro a sostegn de sanità, scola, joegn, sport e desvalive atività per l teritorie. Del 2021 volon esser amò più apede al teritorie e esser protagonisć de la repartenza de la comunanza.«

»I resultac ezelenc che l’Istitut à registrà via per l 2020, dò trei egn da l’emportanta operazion de fujion con Primier, l’é l resultat de na gestion ascorta e previdenta che vegn da dalonc e che la é stata bona de renforzèr noscia realtà la enjignan a la endesfides de ades e de cheles del davegnir - à dit Ruggero Lucin, diretor general de la Cassa Rurala Dolomites. Chest ciapa amò più emportanza te chest moment, dò n an da canche l’é crepà fora la pandemia, na situazion che nesciugn aea pervedù e che à metù sotessora i raporc sozièi e economics, ma te chela che noscia Cassa Rurala à sapù se confermèr na realtà segura e che seghita a crescer, bona de se tor dant con capazità sie ruol economich e sozièl per l ben de dut l teritorie.«

 (mci)