La Usc di Ladins

Maor sostegn per i lurieranc tocé da la crisa per la pandemia da Covid. Enstadì l’assessor al svilup economich, enrescida e lurier Achille Spinelli, ensema a Laura Pedron, dirigenta del Departiment lurier de la Provinzia de Trent e Stefania Terlizzi, diretora de l’Agenzia del lurier, à rejonà en videoconferenza con la sotsecretèra al lurier e a la politiches sozièles Tiziana Nisini.

I raprejentanc provinzièi à prejentà n emendament al Decret Sostegnes bis del Goern per domanèr che vegne tout demez la tasses sui neves contribuc Covid per i lurieranc sajonèi, mesura che la Provinzia enten meter ite te sia manovra finanziaria. »Descheche vegn jà fat per la firmes – à dit Spinelli – ence per la persones fisiches volassane che no les cogne ge paèr sora l’Irpef ai contribuc che les ciapa. A chesta vida l contribut net fossa più aut e l sostegn più utol.«

A la sotsecretèra Nisini ge é stat dit ence che la Provinzia speta amò che Roma ge dae deretorn i scioldi per l Fondo de solidarietà, 14 milions de euro che la Provinzia ge à antizipà ai lurieranc trentins ti meisc de mèrz-mé del 2020. »Ressorses che volon destinèr al sostegn di lurieranc tocé da la crisa economica« – à deschiarì Spinelli.

E tinultima ge é stat sotlineà la forta volontà de la Provinzia de gestir la politiches atives del lurier sul teritorie travers l strument de Agenzia del Lurier. »Aon dat proa – à dit l’assessor Spinelli – de na gestion efizienta de la competenzes te chest setor.«

La sotsecretèra Nisini à responet che la rejonà te tempes curc de chesta costions al minister del lurier Andrea Orlando e con i raprejentanc de l’Inps.

 (mci)