Mobilità te Fascia, se empea l debatit

Data

16 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La Neva UAL à endrezà na scontrèda con Mauro Gilmozzi che à metù dant l projet del Bus Rapid Transit. Chesta sera l’enconter en streaming é con Massimo Girardi president de Transdolomites.

Soscedèr l debatit e smaorèr la cognoscenza. Con chisc obietives la Neva UAL à endrezà na lingia de momenc informatives en streaming sul tem de la mobilità te Fascia. En mercol ai 7 de oril l’é stat l prum apuntament con l relator Mauro Gilmozzi, jà assessor a l’urbanistica, enc locai, personal, lurieres publics e viabilità de la Provinzia de Trent che endèna sie mandat à fat aproèr la lege provinzièla 6/2017 su la pianificazion e gestion di intervenc en materia de mobilità sostegnibola.

Gilmozzi, dò aer fat n chèder de l’evoluzion di mesi de trasport dal XIX al XXI secol, l’à metù al luster i obietives de la Provinzia de Trent che con la lege provinzièla nr 6 del 2017 la vèrda a na mobilità sostegnibola entenuda desche sistem integrà e multimodal che permete de smendrèr la dependenza da l’elech minerèl e da la materies prumes che no é renovaboles, zenza sacrifichèr l’efizenza e l derit a la mobilità. Per arjonjer chisc obietives la se met dant soraldut de smaorèr l trasport publich per ruèr dant del 2030 al 60% de jent che se mef coi mesi publics e demò l 40% con l’auto privat.

N auter pont de veduda su la mobilità te la valèdes de la Veisc vegnarà portà dant chesta sera, vender ai 16 de oril semper da les 20.30, ajache la Neva UAL à endrezà na scontrèda con Massimo Girardi, president de Transdolomites, che da egn sostegn la projet de la ferata.

BRT, ferates, circonvalazions, coleamenc a fun: la discuscion va inant e la scontrèdes de la Neva UAL ence.

De più su La Usc stampèda de vender ai 16 de oril.

 (Monica Cigolla)