La Usc di Ladins

L prinz di formaes l’é a El Mas de Moena. L Puzzone de Moena del Cajelo del Mas de Michelangelo Croce l’é ruà enstadì a la semifinèla del »6° Premie Italian Cheese Awards 2021«. 

100 sorts de formaes da duta la Tèlia spartii fora te 10 desferenta categorìes é stac cernui per la semifinèla: i più fresc, i fresc, da pasta teca, da pasta filèda, da pasta filèda sajonèda, mez sajonà, sajonà, sajonà sora i 24 meisc, da saores, erborinato. Publich e operatores à podù cercèr e litèr te desferenc dis, en domenia ai 8 de oril i à lità per la categorìa di formaes da pasta teca olache l’é ite ence l Spretz Saorì del Cajelo del Mas. La selezions é states te le Osterie Moderne de Campodarsego te la provinzia de Padova.

L Puzzone de Moena l’é n formai recognosciù a livel internazional ajache del 2019 l’à ciapà ence la zertificazion DOP. Ades se cogn demò spetèr de saer coluns che sarà i trei miores formaes da pasta teca che jirà a la finèla. I finalisć vegnarà anunzié en vender ai 30 de oril da les 20.30 en direta Facebook su la piata @italiancheeseawards.  (Monica Cigolla)