La Usc di Ladins

No l’é amò segurezes per l mond sportif, soraldut per chel amatorial leà a la roda canche se trata de endrezèr garejèdes con i auc numeres de l’era pre-Covid. Dachelanvìa, enceben con gran recor, l Comitat de endrez de la Marcialonga à bele cognù renunzièr a l’edizion 2021 de la Marcialonga Cycling Craft perveduda en domenia ai 30 de mé. L staff à chierì ogne soluzion possibola per schivèr che la vegne descancelèda dal calandèr agonistich, ma no l’é stat nia da fèr. Massa auc amò i risesc, tant per i atlec che per si compagnadores, ma ence per i sacotenc volontadives che ogne an se dèsc jù per la garejèdes de Marcialonga. Enceben che se aesse pissà ence a la scurtèr, la gara aessa tocià trei provinzies desvalives, Trent, Busan e Belun e donca doi regions Trentin-Sudtirol e Venet e chest l’é stat la rejon maora de la scelta de la anulèr.

Se jirà donca diretamenter al 2022 canche, se spera, se podarà endò esser te na mior condizion sanitèra. L president de la Marcialonga Angelo Corradini à palesà dut l despiajer de chesta scelta: »La competizions che endrezon no l’é demò gares agonistiches. Les à l’obietif de fèr goder i partezipanc e zenza l pasta party, i momenc inant e dò la garejèda e etres de agregazion, restassa demò la fadìa e no fossa più Marcialonga.« Ence l secretèr generèl Davide Stoffie à dit che no l’é stat sorì dezider per l’anulament e che la iscrizions restarà dutes bones per n auter an. »Aon pissà ence a la sburlèr de dotrei meisc – à dit Stoffie – ma no fossa stat giust ti confronc de autra competizions, ajache magari se assane sorapeà a l’endrez.« L’apuntament l’é donca per l 2022 con la medema gaissa de semper.  

 (Monica Cigolla)