La Usc di Ladins

En jebia ai 22 de oril Andrea Weiss à fenì sù sie percors de lurier da diretor de l’Apt de Fascia. 25 egn che ge à lascià na bela e fona esperienza, ence personèla, e che l’à fat cognoscer te val e foravia per sia capazitèdes e sie valores profescionèi e umans.

 

Can siede doventà diretor de l’Apt de Fascia?

É tacà a far l diretor l prum de mé del 1996. Dant ere stat vizepresident, president l’era Osvaldo Debertol, diretor Giorgio Cincelli che aea tout l post de Ezio Anesi, jà canche l se aea metù en politica. En chel an, a la fin de mé, ruaa l »Giro d’Italia« sun Pordoi e i aea vedù che ge volea valgugn che se cruzie de chest a dò a dò, Giorgio enlouta l luraa te ofize di foresć sa Vich.

Che lurier fajaède dant?

Gio fajee l general manager de l’Hockey Club Fascia, Fiorenzo Perathoner me aea domanà de jir te Apt en raprejentanza di impianc portamont. L’idea l’era chela che vegne dò Diego Perathoner, che enlouta l’era amò mingol joen. Son stat l prum diretor de n ent publich chiamà diretamenter con n contrat privat. Cogne dir che me aee jà fat cognoscer te val del 1994 coi Mondiai de hockey del grop A, l president de l’Hockey Club Fascia Valeriano Vianini me aea domanà de vidar l Comitat de endrez. L’era la fin de oril e me recorde che aane 500 volontadives che dajea na man per l’endrez. Enlouta mie prinzip l’é doventà chel de n dessegn unitar che tole ite duta la val per valorisar n patrimonie unich.

Canche aede tacà erel jà na Apt soula sun duta la val?

Ei, ma l’era amò trei diretores che raprejentaa le veie aziende del turism: Livio Gabrielli diretor a Moena, Giorgio Cincelli per l zenter Fascia e Tarcisio Davarda diretor de Cianacei. Canche é tacà gio a cheste trei persone ge é stat dat sù enciarie neve con responsabilità de setor e no più a zone: Livio se à metù a lurar per la promozion, Giorgio per l’informazion, Tarcisio per l web e l svilup de la part digitala. Se aon endrezà via con na Azienda più struturada e da na ventina de dependenc, che luraa soraldut ti ofizies di paijes, sion rué a 35.

Duta l'intervista é da poder lejer su La Usc stampèda de vender ai 30 de oril.

 (Monica Cigolla)