La Usc di Ladins

Enceben che l temp te Fascia fae mingol l mat, desche perauter de spes te chesta sajon, l’é oramai ora de l’Aisciuda Ladina. Chest event, nasciù del 2009 per viventèr la cultura, l lengaz e l’identità ladina te Fascia e te l’autra valèdes entorn l Sela, cognarà peèr via ence chest an a na vida virtuala, desche l’an passà.

Apontin del 2020, per via del pericol da malac, l’é stat fat l nef sit internet (www.aisciudaladina.it) che ence chest an vegnarà atualisà con neves contegnui. Semper a cajon del Covid, che à limità debel l’edizion de l’an passà, ence l’argoment per chest an restarà chel de l’ambient, che merita de vegnir svilupà e valorisà miec.

Dai 3 de mé donca sul sit sarà da poder veder i saluc istituzionèi di raprejentanc de chisc Enc e Sociazions che ogne an endreza l’Aisciuda Ladina, e segur no menciarà l salut la mascotte de chest event, Bertol, semper spetà soraldut dai più picoi, ampò amò chest an sforzà a se fèr veder demò tras n video.

Apede a chest, semper travers de curc filmac, se podarà scutèr i intervenc e i pensieres de persones che laora a contat co la natura o che se cruzia, te desvaliva vides, de ambient e teritorie.

Ajache l’Aisicuda Ladina tol semper ite la dì di 5 de mé, festa de la bandiera dai trei colores brun, bianch e vert, che l’an passà à compì 100 egn, l’Union di Ladins de Fascia portarà dant te chesta setemèna na azion promozionèla, ge dajan l met a duc de se proveder ite a n priesc spezièl la bandiera ladina da poder meter fora ti dis de l’Aisciuda e ence più inant, per ejempie a la fin del meis de mé  en ocajion del passaje del »Giro d’Italia« fossa bel veder fora l simbol de noscia jent ladina.

Duta la scomenzadives de l’Aisciuda Ladina te l’articol su La Usc stampèda de en vender ai 30 de oril del 2021.

 (Lucia Gross)