La Usc di Ladins

Somea dalbon na contia, chela che ve meton dant. Na contia che pea via te n gran palaz de Addis Abeba, con vidores piens de piantes esotiches e dut l bel e l lus che na beza pel se fegurèr. N ensomech, da olache chesta beza se desceida dut te n colp, per se troèr te na realtà da strassomech.

L’é l 1935 e la beza l’é Martha Nasibù.

A ne la fèr descorir l’é stat l conseier de procura del Comun general de Fascia con competenzes ence su la cultura, Amedeo Valentini.

»Volesse recordèr avenimenc sozedui acà n muie de egn – l ne à scrit – che fosc zachei cognosc jà, ma che per zachei de etres i podessa esser deldut neves e donca l’ocajion per descorir n mond fat de marevees che, descheche l’é stat per me, l ne verc i eies e l cher descheche demò la storia sà fèr e che la fèsc vegnir voa de chierir de n saer de più«

L recort di fac storics

»I fac – scrif Valentini – conta de na prinzessa etiope che à inom Atzede, femena de n om valorous, Zamanuel Nasibù, che à l titol onorifich de »degiac«. Con si fies i vif na vita da ensomech te sie palaz tel zenter de Addis Abeba, cercené da servidores e ogne sort de richeza, ma ence da spiritualità fona e tradizions de milenees. La storia de chesta familia etiope pea via al temp de l’imper fascinous de l’ultim »Re dei Re«, l Ras Tafari Negus Haile Selassie, 224eisem descendent del Re Salomon.

L’encant se crepa ai 2 de otober del 1935, canche la Tèlia fascista, fajan èschies del tratat de pèsc sotscrit pec egn dant, la ge declarea vera zenza nesciuna rejon al stat pazifich de l’Etiopia.

Atzede e si fies i à stat ence te Fascia… él zachei che se recorda?

»Ma colun él l leam anter duc chisc fac storics, ben segur enteressanc, e na picola val desche la noscia?« Se domana e ne domana Amedeo Valentini.

L leam l’é, ajache tel lonch ejilie Atzede, con la fies Amaretch e Martha e i fies Berhanu e Theodros i rua ence te Fascia, e no demò una outa ma adertura doi. La pruma outa, del 1939, i rua sa Vich, olache i stèsc per trei meisc. La seconda outa, cater egn dò,  i rua a Poza, olache i se ferma n an entriech.

Fossa dalbon enteressant, fenesc fora Amedeo Valentini, saer se amò anchecondì a Vich o a Poza l’é zachei che te chi egn l’era bec e che i se recorda amò de chi bec da la pel scura che per n trat i é stac te nesc paijes.

Nos aon fat vèlch enrescida e aon troà fora vèlch, che podede lejer su La Usc stampèda de en vender ai 30 de oril del 2021, e se l’é amò zachei che dò aer let chesta piata i se recorda o i troa fora notizies, informazions, o magari ence vèlch retrat fat chiò te val, i pel ne l fèr saer te redazion o diretamenter a Valentini a la direzion mail amedeo.valentini@cgf.tn.it

 (Lucia Gross)