La Usc di Ladins

I à dat la neva en direta Facebook en vender sera ai 30 de oril sul sit de »Italian Cheese Awards«.

L formai Puzzone de Moena del Cajelo del Mas de Michelangelo Croce l’é anter i 10 finalisć del concors 2020/2021. L’é stat cernù ensema al formai Arunda de la mèlga Englhorn del Sudtirol e al Pecorino Sig. G del masc Lischeto te la Toscana te la categoria di formaes da pasta teca.

I miores 3 formaes de 10 categories en concors é stac cernui fora da na comiscion de esperc zertifiché. I responsaboi del concors à dit che chest an se à smaorà dassen l livel de la calità di formaes e che donca l’é stat più senester dèr fora la nominations.

L malghier Peter Decrestina à palesà gran sodesfazion per chest resultat. »Sion n muie contenc de esser rué en finala soraldut per l fat che nosc formai che l’é scempie e l vegn fat con na tecnica veia l’é stat cernù anter formaes de ogne sort che vegn fac con tecniche desvalive e ence moderne, n’é de chi che vegn metui tel fegn, de chi che vegn metui te cianeve aposta. L nosc l vegn fat descheche lo fajea nesc veies. Ades no ne resta auter che spetar l resultat final, ma sion jà contenc de esser rué fin a chest livel. Se aon jà pissà che n auter an prejentaron al concors nosc »Brun de Fascia« che l’é l’erborinato che fajon chiò te cajelo.«

La finèla sarà en domenia ai 21 de november a Cittadella tel chèder de na manifestazion per l’avertura del marcià de Nadèl.

Endèna complimenc donca a El Mas de Moena per chest emportant recognosciment.   (Monica Cigolla)