La Usc di Ladins

L’é dalbon n servije prezious, portà inant con competenza, bon endrez e creanza, chel peà via acà trei setemènes per poder fèr l vazin anti Covid-19 te Fascia.

Dò la domana uzèda fora dai aministradores di Comuns e del Comun general de Fascia de poder aer n zenter de vazins ence te val, la Crousc Checena se à metù a la leta col didament di Studafech e de dotores e infermieres volontadives per endrezèr la palestra de la scola mesènes de Sèn Jan, olache da en sabeda ai 17 de oril ogne sabeda e domenia se pel jir a se fèr encalmèr.

L bon endrez, col didament de na dejina de volontères anter sanitères e enciarié de la logistica (registrazions, sanificazins e c.i.) permet de encalmèr presciapech 24 persones a l’ora, donca ades che dut é dò a ruèr al standard maor se pel ruèr a 220 persones en dì. Tel prum fin de setemèna, pean via de sabeda domesdì, l’é stat fat passa 250 vazinazions e l fin de setemèna passà se é rué beleche a 400.

»Cognon tacar de vender domesdì  - ne à dit l president de la Crousc Checena de Fascia Francesco Sommavilla – con 5 o 6 volontaries per montar dute le postazion, e de domenia sera smonton dut, coscì fora per la setemana la palestra resta a disposizion di studenc. Canche serarà le scole no saon amò se podaron far ence i autres dis, perché l’é ence le scomenzadive de l’istà per i bec. Aboncont pisson che sarà da jir inant enfin a chest uton, volassane che reste n zenter de vazins stabol de val e via per l’istà sarà più senester poder seghitar semper a far cont sun duc chisc volontadives locai«.
Francesco Sommavilla à recordà che n rengraziament particolar l va fat a Lucia Dellagiacoma, caposala de la infermieres de Fascia ma ence volontèra, che la se à dat dalbon n muie da fèr per poder concretisèr chest servije.

De più su La Usc stampèda de en vender ai 30 de oril del 2021.  (Lucia Gross)