La Usc di Ladins

L’é giusta en cors chisc dis la selezion, per titoi e ejam a ousc, per tor sù a temp determinà te Comun general de Fascia la fegura de funzionèr per i Servijes linguistics del Comun general de Fascia, al post de Sabrina Rasom, cernuda per tor sù a temp determinà l’encèria de diretora de l’Istitut Cultural Ladin. Te chisc meisc passé, a fèr da responsabola di Servijes linguistics, l’era stat nominà Luciana Detomas, che ampò tel meis de mé la fenirà sia atività de lurier per jir en penscion.

Dachelanvia ades l CGF à metù fora n auter bando de concors per ejames, chest’outa per n post a temp indeterminà, per na fegura profescionèla de assistent aministratif tradutor de ladin a temp pien de categoria C Livel de basa.

Per chesta fegura, apede a duc i requisic de zitadinanza e idoneità pervedui da la normatives per i dependenc publics, vegn domanà l diplom de scola auta de 5 egn e l’atestat de cognoscenza del lengaz e de la cultura ladina de livel B2 o maor.

Chi che vel tor pèrt i cogn manèr ite la domana al Comun general de Fascia, con duc i documenc pervedui dal bando, dant dal mesdì de en mèrtesc ai 25 de mé del 2021.

La domana pel vegnir manèda ite tras posta eletronica zertifichèda dai candidac che à na direzion PEC personèla a la direzion: pec.cgf@pec.comungeneraldefascia.tn.it. o ence tras posta racomanèda tel respet di termins pervedui o consegnèda a man, te Ofize de Canzelarìa del Comun general.

La lingia di candidac ametui a chest concors publich vegnarà publichèda dant che sibie fora i 4 de jugn del 2021 su l’albo telematich on-line e sul sit internet del Comun General de Fascia www.comungeneraldefascia.tn.it. Chesta publicazions vèl desche notificazion ai candidac, no vegnarà manà neguna comunicazion personèla e su l’albo telematich e l sit del CGF vegnarà dapò metù ence la dates de la proes.

La graduatoria de merit de chest concors publich la sarà valevola per trei egn alalongia, a tachèr da la dì che la vegn aproèda. L’assunzion é sotmetuda a n trat de temp de proa de sie meisc.

De più informazions e dut l bando entriech é a la leta sul sit del Comun general de Fascia.






 (LG)