La Usc di Ladins

I Studafech volontadives e i Schuhplattler de Ciampedel i à sperà enscin en ultima che vegne fora mingol de soreie per poder meter a jir la belota festa che i aea endrezà per la sègra di Sènc Felip e Giaucum.

L catif temp e la ria situazion del Covid no à lascià fèr trop, aboncont i é stac bogn dut un de ge donèr a la jent n moment n muie sentù de comunanza e de legreza.

Jà via per la setemèna l’é stat taà na stengia bela auta che é stata fornida co na gherlanda de dasces e bandieres, la é dapò stata uzèda sù te mez paìsc coscita che duc posse la veder.

La vea i é passé cèsa per cèsa a ge portèr a duta la families n piat de bogn grostoi.

La domenia dadoman desche da tradizion per dut l paisc à rendenà la schiopetèdes de la paicenes che à envià duc a se descedèr e se verteèr a fèr sègra. Da les nef l’é stat dit Messa Grana e la lauda al Signoredio e ai doi Sènc se à levà con de bela cianties e orazions ence per ladin.

Dò Messa la jent se à fermà sun sagrà olache l’é stat n bel moment de comunanza e benedì l nef meso di studafech volontadives.

Podede lejer de più su la sègra de Ciampedel su La Usc stampèda de en vender ai 7 de mé del 2021.  (Annelise Vian)