La Usc di Ladins

L’emergenza che sion dò a viver a cajon de la pandemìa Covid-19 l’à soscedà reazions de stress anter i operadores sanitères che laora en pruma linea ma ence anter la popolazion che la é dò a viver chisc momenc malsegures e soraldut anter i joegn che i é dò a sperimentèr n sens de solentum palesan segnèi de dejèje psicologich.

La Conseiera de Procura Mirella Florian e l Servije Sozio Assistenzièl del Comun general de Fascia dessema col dr Luca Follador e co la I.P. Lucia Dellagiacoma i à portà dant la costion en cont a chel che se pel fèr te chest moment scherpent per didèr la comunanza de Fascia.

Aer informazions chières da pèrt de esperc l’é bensegur de ùtol per didèr la persones a ge fèr front a na vida positiva a na situazion desche chesta che la muda a dò a dò e che, purampò, no la é amò fenida.

Avisa se trata de trei seres de informazion e de confront metudes a jir online tras la piataforma Google Meet con enscinuazion a sociale@cgf.tn.it coi profescionisć de la Sanità Mentala che i laora tel Zenter de Sanità Mentala de Ciavaleis.

Chisc i dis e i argomenc:

Ai 11 de mé: »I elemenc de stravardament e de risech per la sanità mentala«

Ai 18 de mé: »Recognoscer, comunichèr e gestir la emozions leèdes a la pandemìa daìte e defora de cèsa«.

Ai 25 de mé: »Sanità mentala e Covid-19: colugn él pa i servijes a la leta sul teritorie?

Per saer de più podede lejer La Usc stampèda de en vender ai 7 de mé del 2021.