La Usc di Ladins

L projet »Saores de noscia tera« l’é nasciù per tor ite la comunanza de Fascia te n percors de enrescida curious e inovatif a la descorida di prodoc de noscia tera. La comunanza vegn envièda a tor pèrt a chest projet con l zil de svilupèr neva cognoscenzes e capazitèdes leèdes a la produzion, regoeta e respet de noscia tera. L projet prejenta, en colaborazion con joegn esperć e firmes de noscia val, desvaliva ativitèdes outes a la jent del teritorie, per svilupèr ensema n percors dinamich per tor ite duc i partezipanc. »Saores de noscia tera« l’é n projet »technology free«: apontin te duta la scontrèdes no se durarà nesciun aparat tecnologich o informatich.

»Saores de noscia Tera« l’é nasciù con l’obietif de ge fèr cognoscer a chi che tol pèrt l mond cultural ladin, a na vida neva deldut moderna. I esperc chiamé a tor pèrt sviluparà percorsc teorich-pratics. Protagonisć de chest percors sarà la aziendes Fiores e Soreie de Sèn Jan e N’Outa de Ciampestrin. Ghesć sarà ence l chef Stefano Ghetta de L Chimpl da Tamion e l’espert micologh Luigi Casanova.

L projet perveit na lingia de scontrèdes a partir dal meis de mé per fenir via per l’uton de otober. Te la pruma scontrèda, perveduda ai 18 de mé domesdì via - da sburlèr sencajo ai 19 o ai 20 per l catitemp - Nadia Pitto de l’Agritur Fiores rejonarà de scirop de zucories, de coche se l fèsc e de duta sia preziousa proprietèdes. L’enconter sarà a l’averta tel respet de la normativa sanitères.

Per ve enscinuèr podede ve oujer te noscia senta al 0462/764545, a Nicoletta al 340/7765522 o manèr na mail a la direzion union@ladinsdefascia.it dant di 12 de mé. Max. partezipanc: 15 persones. Sion atives ence sun nesc canai social Facebook e Instagram e sun WhatsApp (0462/764545). Per tor pèrt no vegn domanà nesciun paament ma se volede podede sostegnir l’atività de l’Union dajan na bonaman. L’enscinuazion vèl per ogne singola scontrèda.

 (Nicoletta Riz)