La Usc di Ladins

Per l secondo an de seghit no se à podù meter en esser la sègra de Sèn Florian, ajache la desposizions Covid no consent amò de se troèr e fèr festa. Aboncont la Frazion de Cianacei la ge tegnia a onorèr so Sènt patron amancol con na bela Sènta Messa.

L capofrazion Rinaldo Debertol l’à rejonà col preve don Mario Bravin e dessema i a convegnù de fèr na bela Messa grana en domenia forin gejia del Sacro Cher, per via che la é maora e per la jent l’era più sorì poder troèr post te gejia.

L’orarie de la Messa l’é stat spostà da les 11, ajache ence fora Ciampedel l’era sègra per Sèn Giacum e l preve à cognù se spartir anter la doi parochies.

La gejia la é stata fornida sù a gran festa, con de bie fiores e con la statua de Sèn Florian meduta en bela mostra a man dreta dedant utèr. L coro a ciantà na bela messa solene, compagnèda da l’organist Paolo Bernard.

No l’é mencià la autoritèdes, i pompieres e ence i bie colores fascegn del Grop folk, de la Mèscres de Cianacei e Gries,  de chi da la Bandiera, del bandierèl de la Musega Auta Fascia con la Marcatenderes e la femenes fascènes.

Ge sporjon a duc n gran develpai per aer onorà Sèn Florian, con la speranza de poder fèr na gran bela sègra de mé del 2022.

De più su la sègra de Cianacei su La Usc stampèda de en vender ai 14 de mé del 2021

 (Assunta Merli)