La Usc di Ladins

Fascia é vertia per tachèr ite na neva sajon e la ponta via endodanef con evenc de gran spessor turistich. La scontrèda de condivijion che l’Azienda per l Turism à endrezà online en mercol ai 5 de mé ge à dat l met a passa 200 persones coleèdes de vegnir metudes en consaputa de la scomenzadives en program.

»Aon besegn de spartir coi sozi pensieres e vijions – à dit dantfora l president Fausto Lorenz – vegnon fora da na sajon da d’invern tragica segnada a dò a dò da la malsegureza. Te chisc meisc aon fat n muie de scontrade per esser vertesc ai mudamenc che ne met dant la lege de reforma del turism, per esser semper vejins al teritorie e esser portadores di enteresc de la val.«

Prejent a la scontrèda ence l nef president de Trentino Marketing Giovanni Battaiola che à responet a desvaliva domanes e schiarimenc da man di sozi en cont a vazins, tampons, lurieranc che vegn da fora de l’Europa e autra costions de endrez per la neva sajon da d’istà. »Sion amò te n moment con regoles e protocoi pech chières, con ordenanzes che muda dì per dì – à dit Battaiola – se spera che prest rue indicazions segures.«

L mudament en esser te le Apt con la lege de reforma de l’assessor Failoni é stat metù dant dal nef diretor Paolo Grigolli che à slarià fora l’envit a duc i sozi de portèr dant idees, indicazions, proponetes: »Con la reforma del turism muda ence la logica de le Apt – à dit Grigolli – olache l 51% de la ressorses cogn esser privates se se vel ciapèr cheles publiches. Per chest volon esser apede ai sozi e scutèr si besegnes, esser pont de referiment e de ispirazion. L’obietif de l’Apt l’é chel de vegnir recognosciuda e legitimèda desche na realtà de suport e de prospetiva per i operatores per ge dèr la spenta a vardèr sorafora, a meter dant proponetes de valor inovatif per l teritorie e sia comunanza.«

De più su la scomenzadives de l'Apt de Fascia su La Usc stampèda de en vender ai 14 de mé del 2021.


 (Monica Cigolla)