La Usc di Ladins

»La roba che più me impegna e me ciarea l’é star ensema ai tosc che i studia e i vif te ciasa con noi. Con lori passe più temp e condivide più robe. Chigiò i empara con pascion l laoro de tisler.« Coscita scrivea Emil Chiocchetti, dal Perù, d’uton del 2018, te na letra publicada ence su La Usc di Ladins destinada »ai amisc, jent de Moena e de le val« per ge dir che l fossa restà amò n an da l’autra man del mondo, olache l’era jà da 12 meisc, percheche »Sente l gran besogn de far valch de più per i purec: i me aida a cambiar e a dejidrar valch de più gran, che va più en là de me, de noi, de dut...  – e amò - Reste mal a veder te che condizion che vif la jent e cotant che rua “violento” nosc mondo coi scioldi e la tecnologia. Me rende proprio cont de le trope contradizion che aon. Sion dò che perdon le robe più importante: se voler ben, aidar i autres, far la carità, jon dò a noi stesc e a nosc egoism, sion dò che perdon la fe e valch de più gran.«
L percors che era dò a ge mudèr la vita al joen da Moena l’era peà via 5 egn dant, canche Emil l’aea pech più che 20 egn. 

Ades Emil l'é vegnù de retorn, l se à maridà con Sofia e l'é dò a lurèr per meter sù con i joegn n grop de volontariat per l'Operazione Mato Grosso de Fascia e Fiem. De otober del 2021 ruarà ence n piciol o na piciola a viventèr la familia de Emil e Sofia che, spetan de veder che che la vita ge resserva, la tegn semper te crigna l’ensomech de poder endò peèr via, ensema, su la via del Perù.

Dut chel che Emil ne à contà l'é da poder lejer su La Usc stampèda de vender ai 11 de jugn 2021.  (Lucia Gross)