La Usc di Ladins

Che entenone pa con la definizion ‘giustizia reparativa’? Per responer a chesta domana ge vel fèr n confront con la realtà penala. Ge vel sotrissèr che la giustizia penala l’à l doer de se cruzièr de la colpevoleza de na persona tras n prozes, canche chesta la é cusèda de n reat, che sie n omizidie, na robarìa o zeche de auter de tèl. Aboncont l’é ence n’autra sort de giustizia, de inom apontin giustizia reparativa: canche se rejona de chesta se conscidra na forma de giustizia che se dèsc jù per aer n prozediment desvalif respet a la giustizia penala, per ge dèr l met a la vitima e a l’imputat de se conzentrèr sun sia emozions. L cusà l vel donca comedèr ite si fai e se tor sù sia responsabilitèdes. Chesta sort de giustizia l’é n prozediment no obligatorie che se basa su la enrescida de n confront te anter la doi pèrts, con l didament de n’autra fegura, de inom mediator, na persona profescionèla che scouta a na vida imparzièla duta doi la mans e la vèrda de n vegnir fora a una.

Endèna l meis de mé, i studenc i à abù l met de tòr pèrt a vèlch enconter con l’avocata Veronica Manca e con la mediatores de giustizia reparativa de noscia Region per descorer fora e descorir chest argoment. Te chesta lezions i studenc à podù entener i conzec de chesta neva sort de giustizia e de se enjignèr ic enstesc per ge portèr dant chest curious argoment ai etres scolees de la scola mesèna. 

De gran emportanza l’é da recordèr a duc e a dutes che l Comun General de Fascia ge à sport a sia comunanza n portel de mediazion, olache se pel se oujer su apuntament per domanèr didament te picola situazions de besegn.

De più su La Usc stampèda de vender ai 11 de jugn 2021.  (I studenc de la clas 4LLLA)