La Coprativa soziala Inout à endrezà l’event online D-GEI Te Museo per prejentar la cultura de Fascia a na vida desferenta vardan de tirar i joegn.
Na discoteca te museo? Ei, se pel far! La dance house del deejay fascian de nonzech Daniel Liberatore per na outa à lascià i bares de Cianacei e la é ruada a empienir ite le sale del Museo Ladin: musega da saut, lum, basc à fat balar ence le statue di alestimenc, che à tout part a la festa con gaissa e legreza. No l’é n ensomech: dut se à concretisà endana l’event D-GEI TE MUSEO, pissà dai joegn de la Coprativa Soziala INOUT dessema al Staff del Museo, con chela de viventar la Majon de la comunanza de Fascia e ge la sporjer al publich a na vida desferenta e piutost feruscola.
Protagoniste del video che se pel veder amò sui canai de Facebook e YouTube del Museo Ladin e de INOUT l’é stat doi beze da Vich, Nina Obletter
e Vittoria Lorenz, che con far gustegol e curious le à scomenzà so viac tras Fascia sun Fedaa. Da la Marmolada nasc la Veisc, che te duc nesc paìjes la porta l’aga, da semper fontana de vita e tel passà motor di molins e de le sie. Passan fora le sezion sul teritorie del Museo desche che fasc la Veisc, Nina e Vittoria le à tout per man l publich e i l’à compagnà stroz per la val, ge moscian ciantogn riches de storia, na arpejon che ne partegn e de chela che duc cognon esser stolc. Mingol de chela aga de la Veisc, le touse i se l’à metuda te doi boce e i l’à portada te Museo, la reversan man a man sui pie o dintorn via i joegn feguranc che le scontraa, regolé su per l’ocajion desche i manichins di alestimenc. I primitives del Dos di Pigui, i bachegn, i sposc, le mascre, sonadores, vivane, sudé, l krampus e adertura ence Sèn Nicolò i se à descedà fora e con marevea de le beze e i à podù tacar a se mever e ge prejentar le sale a le doi vijitadore. Dut chest endana che Daniel deejay seghitaa a sonar con gust, fajan scorlar ence i mures de le ciase de Sèn Jan.
De più su La Usc stampèda de vener ai 11 de jugn 2021. (Thomas Zulian)
