La Usc di Ladins

Ai 10 de jugn, a l’età de 93 egn, l’é se n jit l maester Felize Defrancesco, recordà per chel che l’à fat per la cultura e per la comunanza de Moena e de Fascia. 

Nasciù del 1927 l’é jit a Trent a studièr te seminarie e dapò l’à fat la scola per doventèr maester. L’à ensegnà te Fiem e Fascia e ence te Mareo, a La Val e a La Ila e a Selva. Vegnù endò te sia val, del ’60 l’à ciapà post ja L Forn olache e del ’67 a Moena. Te chel an l’é stat lità ence a cef de la direzion del Grop Ladin da Moena e l’é ruà te Comun.

Del ’70 i à aproà l’ensegnament de cultura ladina e ensema con l Simonin Chiocchetti Maza l’à dat la desponibilità a jir a ensegnèr ladin te duta Fascia: l cognea spartir sia 24 ores te 8 scoles: Vich, Poza, Pera, Mazin, Ciampedel, Cianacei, Dèlba e Penia. Materiai no n’era e i cognea se studièr fora e endrezèr dut enstesc. Dal ’69 al ’89 l se à cruzià de la biblioteca del Comun de Moena e l’é stat ence President de la Coprativa e canzelist del Zircol de la jent de età. 

La comunanza de Moena la l’à saludà con recognoscenza en sabeda ai 12 de jugn te gejia de Sèn Vile e la se à strent entorn a la femena Renata e ai fies Fabrizio, Marilena e Mariarosa e a duc chi de cèsa.   (Lucia Gross)