La Usc di Ladins

La tradizion de empeèr sù i feghes sui monc per renovèr la devozion al Sacro Cher de Gejù é stata respetèda ence chest an. Ogne an la terza domenia dò Pèsca de mé vegn zelebrà te dut l Tirol la Domenia del Sacro Cher de Gejù. Te chesta dì defat l’é usanza veiora empeèr sù i feghes sui monc, feghes che i cogn vegnir vedui da dalonc, te duta la valèdes, per recordèr l jurament de fedeltà al Sacro Cher de Gejù del 1796, fat per domanèr la grazia de defener la patria da l’invajion franzousa de la trupes de Napoleon.

Ence te Fascia da dotrei egn en ca l’é endò stat viventà chesta veiora tradizion de gra a volontadives di Scizeres e del Grop Folk de Soraga che ge tegn percheche chesta usanza no vae a morir fora. Apede al spirit de devozion per l Sacro Cher de Gejù, semper n muie gran e vif te la jent de Fascia, l’é se sà ben ence l’ocajion per se troèr e fèr grop. Te doi lesc de Fascia chest an l’é stat empeà sù i feghes del Sacro Cher de Gejù, per endrez del Grop e Folclor de Soraga sun Sas da la Crousc e per endrez di Scizeres de Fascia a Ciampedel.

De più su La Usc stampèda de vender ai 18 de jugn.  (Monica Cigolla)