La Usc di Ladins

L’era l’istà del 2013, da pech la comunanza de Fascia aea saludà le monie salesiane de Don Bosco, se n jite da Sèn Jan, canche con legreza la jent de Poza, Vich e Pera aea podù ge dar l benvegnù a de autre monie, chele de l’orden de la Sacra Familia de Nazareth, congregazion metuda sù da la polaca, beata Francesca Siedliska (Beata Maria di Gesù Buon Pastore) e ruade te Fascia per enteressament de don Giuseppe Da Prà.

Le prume trei monie, Livia, Natalia e Dorota, aea troà azet tel picol cartier sunsom l’oratorie e sobito le aea tacà a se dar jù te desvalives setores: coi bec te la catechesi, per viventar e fornir la gejia, te la pastorala, con le familie e con la jent de età.

Te chisc 8 egn l’é stat desvalives mudamenc, valch monia é stata manada te autres lesc, de autre é ruade a se far ite te noscia comunanza, ma dal 2013 suor Livia era semper restada, desché pont fis te la crescimonia cristiana de la comunanza. 

Ades l’é vegnù l temp ence per ela de lasciar Fascia per responer a na neva chiamada che ge é stat metù dant: te pech temp la jirà endò te sia tera de Polonia.

Per chest l’ultim fin de setemana la comunanza parochiala de Poza e de Pera à volù rengraziar e saludar suor Livia te le doi messe de la sabeda e de la domenia sera.

De più su La Usc stampèda de vender ai 18 de jugn.  (Lucia Gross)