La Usc di Ladins

Na burta neva é ruèda anché te Fascia: Luca Nardelli, responsabol de Igiene publica e stat ence diretor per l’APSS tel Distret Sanitèr de Fascia e Fiem, l’é mort te la net anter i 17 e i 18 de jugn. L se à sentù mèl e l’é stat troà anché da doman te let zenza vita, fazile a cajon del bot.

L dotor Luca Nardelli l’aea 60 egn e l’era n muie cognosciù e aprijià te Fascia, no demò per sia profescionalità e competenza ma ence per sia gran umanità. Dut l personal e i operatores del Distret sanitèr de Fascia i é resté zenza paroles dal gran despiajer canche se à sapù la burta neva. 

La partezipazion piena de stima e de benvoler é ruèda ence da man di aministradores fascegn, che à abù l met de cognoscer e aprijièr la desponibilità e l’umiltà del dotor Nardelli soraldut te dut l temp de l’emergenza del Covid-19. 

Jà de mé del 2020, canche l’era stat metù a jir i ejames sierologics a Ciampedel e Cianacei, l dotor Luca Nardelli, enceben che sie stat n dirigent, l’era stat sobito desponibol en pruma persona e debant, desche volontèr, per didèr te chest screening. 

Paroles de gran stima e recognoscenza per l dotor Luca Nardelli, de fon despiajer per la manconia e de vejinanza a sia familia é ruèdes sobito da man del Procurador del Comun general de Fascia Giuseppe Detomas, ence a inom di conseieres de procura, di ombolc de Fascia e de dut l Consei de la Sanità. »Te chisc meisc passé se aon troà ensema ogne setemana a le scontrade del Consei de la Sanità per tegnir sot control la situazion del Covid e dezider i varesc da far per la gestion de la pandemia te val, e l dotor Nardelli l’era semper, no l’é mai mencià e l’à semper metù a la leta soe competenze con umiltà e umanità. Sion dalbon destrametui per chesta grieva manconia.«

Ence l conseier provinzièl Luca Guglielmi e la senatora e ex procuradora Elena Testor, a inom personèl e de duta l’aministrazion del Comun General ti egn 2015-2020, à lodà la desponibilità desmostrèda da Nardelli te dut l temp che i é stac chiamé a gestir ensema la pandemia canche, enceben pien de lurier e empegnes, no l’à mai fat mencèr sie gran didament da volontadif ence sorafora sie lurier.

Duta la comunanza de Fascia, tel dolor per chesta departida, palesa la recognoscenza per l dotor Nardelli e la vejinanza a sia femena e a duc chi de cèsa.  (Lucia Gross)