La Usc di Ladins

»Ence se l’an 2020 l’é stat n an n muie senester per duc, noscia sociazion à chierì de fèr l possibol per mantegnir i contac con i volontères e per ge dèr l met de seghitèr a donèr sanch.« L’é la paroles del president de l’ADVSP intercomprensorièla de la valèdes de la Veisc Clerio Bertoluzza che en sabeda ai 26 de jugn à chiamà ite la radunanza anuèla te la sala Bavarese de Tieser.

Dantfora l president ge à sport l develpai a la sociazion AIL Trento per la colaborazion a comprèr na frigoemoteca che ge é stata sporta a l’ospedèl de Ciavaleis. Se trata de na sort de frigo per l mantegniment segur del sanch entriech o de si componenc e i aer semper a la leta tel cajo de urgenzes. 

Lucia Dellagiacoma, responsabola del Servije infermieristich de Fascia, che era en coleament virtuèl à dit che »L 2020 l’é stat n an dalbon senester aon cognù lasciar sù per n trat de temp col servije de regoeta de sanch, per via del Covid ma ence per l’empegn sul teritorie del personal e del dotor Simone Romano che ge stasc dò a la regoeta, ma la volontà de mantegnir l servije é semper stata.« Dellagiacoma à domanà mingol de pazienza e l’à dit che i spera de poder endò arsegurar la consegna asvelta di ejames ajache l’é n bel numer de jent che vel far part de la sociazion.

L president Bertoluzza à rengrazià i donatores, i volontères e i coordenadores che ge stèsc dò, i componenc del diretif da inant e da ades e l’à domanà n menut de acort per i donatores se n jic del 2020 e 2021 e per l dotor Luca Nardelli, mort la net anter i 17 e i 18 de jugn.

De più su La Usc stampèda de vender ai 9 de messèl.  ( Monica Cigolla)